नोंसिनि लांगोनाजों

अजित कुमार ब्रह्म > गोरिबनि देंखो मेथाय आरो खन्थाय

गोबाव जाथारबायमोन लै खन्थाइ लिरथारैआ जाबा - दाजानो मोनसे होलायबाय........

नोंसिनि लांगोनाजों

सम - सम थाबाय हैयो आं नोंसिनि लांगोनाजों
नोंखौ नुहैगोन्नि मिजिं लानानै
नाथाय गैया माथो नोंखौ नुनो मोना
गिदिंबोफिन्नांगौ जायो मोखां सायर'यै ।
दोहौ सोमजियो आंनि गोर्लै गोर्बोआव
गिख्रंथाव दै बाज्रुम बायदि;
हुरा - हुरा गाबखांबाय थायो आंनि गोसोआ
नोंजों नेउसि जानायनि ।
नोंनोथ' फोरोंदोंमोन आंनो मोजां मोन्नाय
नोंनोथ' होग्रोदोंमोन आंनो गिबियै अन्नाय,
नाथाय बै नोंनि अन्नाया मानो दिनै...
अखा - हादैनि दै फेंफोरना बायदि;
मा बे फोथायखेबस' जायाखै
मा बे आंखौ दुखुहोनाय जायाखै ???
सिरिनाय बिबारा रलहायो
बैसो जायोब्ला सुबुंआ बोरायो - बुरैयो
बिद्विनो नोंनि समायना महरावबो सानसे....
गोसोम जोमै दाखा नानेखाया बाफबगोन
समायना महरा रोमै - रोमै गोमोर लांगोन ;
अब्लानो नोंनि दुग्गानाया बेसेन गैयि जाहैगोन ।
नोंनोथ' होदोंमोन रादायखौ
नोंनोथ' सिफाय फिनबाय दौलेंखौ,
मा बे फाब हाबा जायाखै ?
मा बे इनाय अहंकार जायाखै ?
नोंनोथ' गोखायाव गोदै सिनि होदोंमोन
नोंनोथ' गुदुं दैआव गुसु दै लुसोमदोंमोन
जेराव आं नोंजों बमब्राय जादोंमोन,
नाथाय बे नोंनि फैमाल मुंनि फावथायसोमोन
बेनि आं नोंजों बिथोन होजानाय राजखुंगुरसोमोन।